Ugu yaraan shan qof ayaa ku dhintay weerarro uu gumeystaha Israa'iil ka fuliyay koonfurta Lubnaan, inkastoo uu weli jiro heshiis xabbad-joojin ah oo u dhexeeya gumeystaha Israa'iil iyo ururka Xisbullah. Weeraradan ayaa sare u qaaday walaaca laga qabo in xiisadda gobolka ay markale sii xoogaysato.
Weerarro Ka Dhacay Koonfurta Lubnaan
Wararka kasoo baxaya Lubnaan ayaa sheegaya in diyaaradaha dagaalka ee gumeystaha Israa'iil ay duqeeyeen deegaanno ku yaalla gobolka Nabatieh ee koonfurta dalkaas. Duqeymaha ayaa la sheegay inay waxyeello gaarsiiyeen dhismayaal iyo guryo ku yaalla goobaha la beegsaday.
Sidoo kale, madaafiic ayaa lagu garaacay meelo kale oo ku dhow xadka ay wadaagaan gumeystaha Israa'iil iyo Lubnaan, iyadoo ciidamada gumeystaha Israa'iil ay sheegeen inay beegsanayeen bartilmaameedyo amni.
Xiisadda Gumeystaha Israa'iil Iyo Xisbullah
Xabbad-joojinta u dhexeysa gumeystaha Israa'iil iyo Xisbullah ayaa qayb muhiim ah ka ahayd dadaallada lagu dejinayay colaadaha gobolka. Si kastaba ha ahaatee, weerarrada cusub ayaa muujinaya in xaaladdu wali tahay mid jilicsan oo khatar u ah nabadda labada dhinac.
Dhanka kale, hadal kasoo yeeray Wasiirka Amniga Qaranka ee gumeystaha Israa'iil, Itamar Ben-Gvir, ayaa sii kordhiyay xiisadda, kadib markii uu sheegay in Lubnaan ay qaadi karto cawaaqib adag haddii weerarro lagu qaado gumeystaha Israa'iil.
Wadahadallada Gobolka Oo Socda
Dhacdadan ayaa kusoo beegmaysa xilli dadaallo diblomaasiyadeed ay ka socdaan gobolka Bariga Dhexe, kuwaas oo lagu doonayo in lagu yareeyo colaadaha iyo in xal siyaasadeed loo helo khilaafaadka jira.
Khubarada arrimaha gobolka ayaa ka digaya in sii socoshada weerarrada iyo jawaabaha milatari ay halis gelin karaan dadaallada nabadeed ee ay hormuudka ka yihiin dalal iyo ururro caalami ah.